Nationa'l ID system, malaking tulong sa paghatid ng social services: DSWD



Umaasa ang Department of Social Welfare and Development (DSWD) na tuluyang maipatutupad ang Philippine Identification System (PhilSys) para sa mas mahusay at epektibong paghahatid ng mga serbisyong panlipunan sa bansa.

Ayon kay DSWD Undersecretary Camilo Gudmalin, malaki ang magiging pakinabang ng ahensya mula sa PhilSys, isang proyekto ng Philippine Statistics Authority (PSA), na layong maging indentification platform ng pamahalaan sa lahat ng residente ng Pilipinas.

Sa tulong ng PhilSys ay magkakaroon ng PhilId ang lahat ng mamamayang Pilipino at maging mga dayuhan na nasa bansa.

"Malaking tulong ito sa DSWD. Una, magkakaroon tayo ng wastong pagkakakilanlan ng mga kliyente at maiiwasan ang misrepresentation at doble-dobleng pagtanggap ng ayuda," sabi ni Gudmalin sa isang panayam sa Philippine News Agency, Miyerkules, (Hunyo 10).

Una ng sinabi ng PSA, ang implementing agency ng PhilSys, na isa sa mga pinakalayunin ng proyekto ang magkaroon ng mas madaling transaksyon sa mga benepisyong hatid ng gobyerno.